Mẫu tìm kiếm

GÉNESIS 49

Jacobo paipac churicuna ima tucuna cashcata huillashcamanta

1Jacobo paipac churicunata cayashpaca: «Tandanacumuichic, cancuna quipaman ima tucuna cashcata huillasha.

2Jacobopac churicuna cuchuyashpa,

cancunapac taita Israelta uyaichic.

3Rubén, canmi ñuca

punta churi cangui.

Canca ñuca huambra fuerzahuan

charishca churimi cangui.

Canmi punta alli nishcapish,

sinchi mandacpish cangui.

4Canca yacu callpacuc shina,

mana jarcaric cashpami,

ñuca sueñuna camapi,

ñuca caishuc huarmihuan sueñushpa,

mana allita ruhuarcangui.

Chaimanta ña mana

punta churichu cangui.

5Simeonpish, Levipish huauquindimi

huañuchic macanacuna shina,

millai canguichic.

6Ñuca shungupica cancuna

parlanacushcataca

mana chasquishachu.

Cancunaca yallita piñarishpami,

gentecunata huañuchircanguichic.

Huagracunatapish piñallamantami

chaquita paquinacurcanguichic.

7Cancuna piñarishcamantaca

mana alli nishcami canguichic.

Cancunaca Jacobopac familiamanta

chicanyachishcami canguichic.

Israelpuramantapish

caita chaita rishpami causanguichic.

8Judá, cambac huauquicunami

alli ninga.

Canta piñaccunataca

cungapi japishpami atingui.

Cambac huauquicunallatacmi

cambac ñaupapi cumuringa.

9Ñuca huahua Judalla,

canca huahua león shinami cangui.

Micushpaca jatun león shinami,

aicha cuchullapitac sirirircangui.

Chaipica, ¿pitac chayaringayari?

10Judá, cambac mandana varataca

pi mana quichungachu.

Varataca chasquingacamanmi

charicunguilla.

Cantaca tucui gentecunami cazunga.

11Mama burropac huahua cari burrotaca

uvas chagrapimi huatanga.

Paipac churanataca

vinopimi tacshanga.

Pucanlla uvasta capishca yacupimi

jahualla churanataca tacshanga.

12Paipac ñahuica

vino colormi canga.

Quiruca leche shina,

yuranllami canga.

13Zabulón mama cucha

patapimi causangui.

Cambac llactaca barcocuna

shayanapimi canga.

Cambac allpaca

Sidoncamanmi canga.

14Isacar, canca sinchi aparic burro

corralpi siricuc shinami cangui.

15Pai siricuc pushtu sumac cacpi,

chai allpapish alli cacpimi,

paipac lomotaca

aparingapac ricuchirca.

Chaipimi servishpa causasha ninga.

16Dan, canca Israel aillu shinami,

quiquin gentecunata

mandashpa causangui.

17Ñan ladopi cac culebra

shinami cangui.

Caballota chaquipi canishpami,

caballopi ricta huashaiman

urmachingui.

18¡Mandac Dioslla,

can quishpichichunmi shuyacuni!

19Gad, cantaca

soldadocunami llaquichinga.

Shina llaquichicpipish,

quipata cungailla

rishpami llaquichingui.

20Aser, canca jatun mandacpac

micuna shina sumac

micunatami charingui.

21Neftalí, canca taruga

shinami puringui.

Taruga shinami sumacta huacangui.

22Joseca yacu ladopi huiñashca

achca granota yura shinami cangui.

Ramacuna pirca jahuata

ric shinami cangui.

23Paitaca piñashpami,

flechacunahuan shitashpa

llaquichirca.

24Paipac maquicunaca

mana shaicushpami

flechacunata charicurca.

Rigracunapish sinchimi carca.

Jacobopac imatapish

ruhuaclla Diosmi

chashna sinchita ruhuarca.

Israelcunata michic

sinchi Rumi shina

Diosmi cuidacurca.

25Cambac taitapac

Diosca ayudangami.

Imatapish ruhuaclla Diosmi

jahua pachamanta tamyachishpa,

mama cuchamanta yacu cachashpa,

achca huahuacunayucta

ruhuashpa bendicianga.

26Ñaupa ñuca taita

bendiciashcata yallimi,

cambac taitaca bendicianga.

Cambac bendicionca huiñaita tiyac

jatun urcucaman shinami

cambac jahuapi canga.

Huauquicunamanta

chicanyashca cashcamantami

chai bendicionca Josepac canga.

27Benjamín, canca

tutamanta huañuchishpa,

puchutaca chishita raquic,

piña atuc shinami cangui» nirca.

28Paicunaca taita Israelpac chunga ishcai aillucunami. Paicunatami shucllancaman bendiciashpa chashna nirca.

Jacobo huañushcamanta

29Chaimantami Jacoboca paipac churicunataca: «Ñucaca huañunallami cani. Ña huañucpica, ñuca ñaupa taitacuna enterrashca jutcullapitac enterranguichic. Paicunataca heteocunapura Efronpac allpapimi enterrarca. 30Chai allpataca Abrahammi tucui paipac familiacunata enterrangapac Macpela pamba jutcucunandi heteocunapuramanta Efronman randirca. Chai allpaca Canaán llactapi cac Mamremanta chimba ladopimi. 31Chaipimi Abrahamtapish, paipac huarmi Saratapish, Isaactapish, paipac huarmi Rebecatapish enterrarca. Chaillapitacmi Leatapish enterrarcani. 32Chai allpataca chaipi tiyac jutcucunandimi Hetpac churicunaman randirca» nirca.

33Jacobo tucui paipac churicunata mandashpaca, cutin camapi siririshpami, changacunata tandashpa, ñaupa taitacunahuan tandanacugrirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index