Mẫu tìm kiếm

مَرقُس 3

3‏-نجی باب

اِلی قوران آدام

مَتّیٰ 12‏:9‏-14؛ لوقا 6‏:6‏-11

1باشغا بیر گون عیسی یِنه کِنیسه گیتدی.‏ اُل یِرده اِلی قوران بیر آدام باردی.‏ 2کَبیر آداملار عیسانی عاییپلاجاق بُلوپ، سَبَّت گونی بو آدامی شِفا بِرِرمیکَه دیییپ، اُنی ایزارلایاردیلار.‏ 3عیسی اِلی قوران آداما:‏ ‏«‏بَری گِل!‏»‏ دییدی.‏ 4اُنسُنگ اُلاردان:‏ ‏«‏شِریغاتا گُرَه سَبَّت گونی یاغشیلیق اِتمِک دُغرومی یا-دا یامانلیق؟ بیرینینگ جانینی نِجات بِرمِک دُغرومی یا-دا اُلدورمِک؟»‏ دیییپ سُرادی.‏ اُلاردان سِس چیقمادی.‏ 5عیسی اِطرافیندَکیلِره قاهار بیلِن باقیپ، اُلارینگ داش یورِکلی‌دیگینه قیناندی.‏ یانگقی آداما:‏ ‏«‏اِلینگی اوزات!‏»‏ دییدی.‏ اُل هِم اِلینی اوزاتدی و شو واقتدا، اِلی دِرِّو شِفا تاپدی.‏ 6فَریسی‌لِر داشاری چیقیپ، عیسانی نَدیپ یُق اِتمِلیدیگی بارادا هیرودیسینگ طارافدارلاری بیلِن ماصلاحاتلاشدیلار.‏

عیسی جِلیل دِریانینگ کِناریندا

7عیسی شَگیرتلِری بیلِن دِریانینگ کِنارینا گیتدی.‏ جلیله‌دِن بیر اولی جِماغات هِم اُنونگ ایزینا دوشوپ گیتدی.‏ 8اُنونگ بیتیرِن ایشلِرینی اِشیدیپ، یهودیه‌دِن، اورشلیمدِن، اِدومیه‌دِن، اُردُن آرناسینینگ آنگیرسیندان، صور و صیدون اِطرافلاریندان اولی جِماغات یانینا گِلدی.‏ 9عیسی جِماغاتینگ ایچینده قیسیلمازلیق اوچین، اُز شَگیرتلِرینه بیر قاییق حَضیرلاپ قُیماغی تابشیردی.‏ 10عیسی اِنچِمه آداما شِفا بِردی، شُنونگ اوچین هِمّه مِریضلِر اُنگا اِلِّرینی دِگیرجِک بُلوپ، یانینا ایتیکلِشیپ گِلیَردیلِر.‏ 11آرخو-جین اِیِلَنلِر عیسانی گُرِنلِرینده، اُنونگ آیاغینا ییقیلدیلار.‏ اُلارینگ ایچیندَکی آرخو-جینلار:‏ ‏«‏سِن خودایینگ اُغلوسینگ!‏»‏ دیییپ قیغیریاردیلار.‏ 12اِمّا اُل اُزونینگ کیمدیگینی هیچ کیمه آیتمازلیغی اُلارا قاتی تابشیردی.‏

عیسی اُن ایکی شَگیردینی سایلایار

مَتّیٰ 10‏:1‏-4؛ لوقا 6‏:12‏-16

13اُنسُنگ عیسی داغا چیقیپ، اُز سایلان آداملارینی یانینا چاغیردی، اُلار اُنونگ یانینا باردیلار.‏ 14‏-16عیسی اُن ایکی آدامی سایلاپ آلیپ، اُلارا رِسولّار دیییپ آد بِردی.‏ اُنونگ واغیظ اِتمَگه ایبِرِن، مِریضلِری شِفا بِریپ، جینلاری کُوماغا ایختییار بِرِن بو اُن ایکی آدامی شولاردیر:‏ شمعون — عیسی اُنگا پِطرُس دیییپ آد بِردی، 17زِبِدینینگ اُغولّاری یعقوب بیلِن یوحنا — عیسی اُلارا بوانِرجِس دییِن لاقابی بِردی، یَعنی ‏«‏آسمان گوپوردیسینینگ اُغولّاری»‏، 18اُنسُنگ آندرِیاس، فیلیپُس، بارتولما، مَتّیٰ، توما، حَلفینینگ اُغلی یعقوب، تِدّی، قایراتلی شمعون 19و عیسی خایینلیق اِدیَن یهودا اِسخریوطی.‏

عیسی و بِعِلزِبول

مَتّیٰ 12‏:22‏-32؛ لوقا 11‏:14‏-23؛ 12‏:10

20سُنگرا عیسی بیر اُیه باردی.‏ اُل یِرده هِم هِمیشِکیلِر یالی، یِنه-ده اولی جِماغات ییغنانانسُنگ، عیسانینگ شَگیرتلِری بیلِن ناهار اییمَگه-ده واقتلاری بُلمادی.‏ 21عیسانینگ قارینداشلاری بو بارادا اِشیدِنلِرینده:‏ ‏«‏عیسی عاقیلیندان آزاشیپدیر»‏ دیییپ، اُنی اَکیتمَگه گِلدیلِر.‏

22اورشلیمدِن گِلِن دین عُلَمالار بُلسا:‏ ‏«‏اُنی بِعِلزِبول اِیه‌لَپدیر، اُل جینلاری، جینلارینگ رِییسینینگ کُمِگی بیلِن کُووپ چیقاریار»‏ دیییشیَردیلِر.‏ 23شُنونگ اوچین عیسی خالقی یانینا چاغیریپ، میثالّار بیلِن سُزه باشلادی:‏ ‏«‏شِیطان اُز-اُزونی نَدیپ کُووپ چیقارسین؟ 24بیر پاتیشاهلیغینگ ایچینده بُلونیشیک بُلسا، اُل پاتیشاهلیق قاییم دوروپ بیلمِز.‏ 25بیر اُیلیگینگ ایچینده بُلونیشیک بُلسا، اُل ماشغالا قاییم دوروپ بیلمِز.‏ 26شِیطان اُز-اُزونه قارشی چیقیپ بُلونسه، قاییم دوروپ بیلمِز، اُنونگ پاتیشاهلیغینینگ آخیری گِلدیگیدیر.‏ 27هیچ کیم بیر گویچلی آدامینگ اُیونه گیریپ، مالینی تالاپ بیلمِز؛ اَوَّل اُنی دانگمالی بُلار، اُنسُنگ اُیونی تالار.‏ 28سیزه دُغروسینی آیدیارین:‏ اینسانلارینگ هِمّه گونَه‌لِری، هِر بیر زادا دیل یِتیرمِلِری باغیشلانار.‏ 29اِمّا مُقادِّس روحا دیل یِتیرِنه آصلا باغیشلانما یُقدور.‏ بو اِبِدیلیک گونَه بُلوپ، اُنونگ بُینوندان آسیلار.‏»‏ 30عیسی مونی:‏ ‏«‏اُل — آرخو-جینلی»‏ دییِنلِری اوچین آیتدی.‏

عیسانینگ اِنه‌سی و دُغانلاری

31اُنسُنگ اُنونگ اِنه‌سی بیلِن دُغانلاری گِلدی.‏ اُلار داشاردا دوروپ، عیسانی چاغیرماق اوچین، اُنونگ یانینا آدام ایبِردیلِر.‏ 32جِماغات عیسانینگ داشینی آلیپ اُتیردی.‏ اُنگا:‏ ‏«‏اِنه‌نگ و دُغانلارینگ داشاردا سِنی سُرایارلار»‏ دییدیلِر.‏ 33عیسی اُلارا جُغاپ بِریپ:‏ ‏«‏مِنینگ اِنِم، دُغانلاریم کیم؟»‏ دییدی.‏ 34اُنسُنگ داشینی آلیپ اُتورانلارا سِرِدیپ:‏ ‏«‏اینه، مِنینگ اِنِم، مِنینگ دُغانلاریم.‏ 35خودایینگ ایسلِگینی کیم بِرجای اِتسه، شُل مِنینگ دُغانیم، آیال دُغانیم هِم اِنه‌مدیر»‏ دییدی.‏

مُقادِّس کیتاب

© 2016,Turkmen Truth. All rights reserved



More Info | Version Index